Join Alva's education institution

ಅಡಿಗರ ಸ್ಮಾರಕ ನಿರ್ಮಾಣವೇ ತನಗೆ ನೀಡಬಹುದಾದ ಗುರುದಕ್ಷಿಣೆ: ಸಮ್ಮೇಳನಾಧ್ಯಕ್ಷ ಎಸ್. ಜನಾರ್ದನ ಮರವಂತೆ

ಕುಂದಾಪ್ರ ಡಾಟ್ ಕಾಂ ಸುದ್ದಿ.
ಬೈಂದೂರು: ಮೊಗೇರಿ ಗೋಪಾಲಕೃಷ್ಣ ಅಡಿಗರು ದೇಶದ ಶ್ರೇಷ್ಠ ಸಾಹಿತಿಗಳ ಸಾಲಿನಲ್ಲಿ ನಿಲ್ಲುವ ಸಾಹಿತ್ಯ ಸಾಧಕ. ಇದೇ ಫೆಬ್ರವರಿ ಹದಿನೆಂಟಕ್ಕೆ ಅಡಿಗರಿಗೆ ನೂರು ತುಂಬಿದೆ. ಆದರೆ ಅವರ ನೆನಪಿಗಾಗಿ ಹುಟ್ಟೂರಿನಲ್ಲಿ ಏನೂ ಇಲ್ಲ ಎಂಬಂತಾಗಿದೆ. ಹಾಗಾಗಿ ನನ್ನನ್ನು ಗುರು ಎಂದು ಒಪ್ಪಿಕೊಳ್ಳುವ ವಿವಿಧ ಕ್ಷೇತ್ರದ ಗಣ್ಯರಿಂದ ಗುರುದಕ್ಷಿಣೆಯಾಗಿ ಅಡಿಗರ ಸ್ಮಾರಕ ನಿರ್ಮಾಣವಾಗುವುದನ್ನು ಬಯಸುತ್ತೇನೆ ಎಂದು ಬೈಂದೂರು ತಾಲೂಕು ಚೊಚ್ಚಲ ಕನ್ನಡ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷ ಎಸ್. ಜನಾರ್ದನ ಮರವಂತೆ ಹೇಳಿದರು.

ಅವರು ಶನಿವಾರ ಉಡುಪಿ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಬೈಂದೂರು ತಾಲೂಕು ಘಟಕದ ಆಶ್ರಯದಲ್ಲಿ ಕಂಬದಕೋಣೆ ಸಂವೇದನಾ ಪ್ರಥಮ ದರ್ಜೆ ಕಾಲೇಜು ಸಭಾಭವನದ ಪ್ರೋ. ಬಿ. ಎಚ್. ಶ್ರೀಧರ ವೇದಿಕೆಯಲ್ಲಿ ಜರುಗಿದ ಕನ್ನಡ ಸಾಹಿತ್ಯ ಸಮ್ಮೇಳನ ಸಾಧನಾ - ೨೦೧೯ನ್ನು ಉದ್ದೇಶಿಸಿ ಅಧ್ಯಕ್ಷೀಯ ಮಾತುಗಳನ್ನಾಡಿದರು.

ಕುಪ್ಪಳಿಯಲ್ಲಿ ಕುವೆಂಪು, ಧಾರವಾಡದಲ್ಲಿ ಬೇಂದ್ರೆ, ಮತ್ತು ಕೋಟದಲ್ಲಿ ಕಾರಂತ ಹೆಸರಿನಲ್ಲಿ ಸ್ಮಾರಕಗಳಾಗಿವೆ. ಅದರಂತೆ ಮೊಗೇರಿಯಲ್ಲಿಯೂ ಆ ಪ್ರಯತ್ನ ಚುರುಕು ಕಂಡುಕೊಳ್ಳಬೇಕಿದೆ. ಕೆರ್ಗಾಲು ಗ್ರಾಮದ ಮೊಗೇರಿ ಕನ್ನಡದ ಎಲ್ಲೆಯನ್ನೂ ಮೀರಿ ಹರಡಿಕೊಂಡಿದೆ. ಕನ್ನಡ ಕಾವ್ಯಲೋಕದ ಮೇರು ಪ್ರತಿಭೆ. ಹೊಸ ನಾಡಿನ ಕನಸು ಕಂಡ ಗೋಪಾಲಕೃಷ್ಣ ಅಡಿಗರ ನೆಲ ಅದು. ಅಡಿಗರು ತಮ್ಮ ಹೆಸರಿನೊಂದಿಗೆ ಮೊಗೇರಿಯ ಮಣ್ಣಿನ ವಾಸನೆಯನ್ನು ಎಲ್ಲೆಡೆಗೆ ಪಸರಿಸಿದರು. ಮೊಗೇರಿಯನ್ನು ಗಾಢವಾಗಿ ಪ್ರೀತಿಸಿದರು. ನವೋದಯ ಕಾಲದಲ್ಲಿ ಅವರು ಬರವಣಿಗೆ ಆರಂಭಿಸಿದರು. ಎರಡನೆಯದಾದ ನವ್ಯವನ್ನು ಅವರೇ ಸೃಜಿಸಿದರು. ಆ ಬಳಿಕದ ನವ್ಯೋತ್ತರದಲ್ಲೂ ಸೃಜನಶೀಲತೆ ಮೆರೆದರು. ಆದರೆ ನಾಲ್ಕನೆಯ ಘಟ್ಟ ಎಂದು ಗುರುತಿಸಬಹುದಾದ ಅಡಿಗರಿಲ್ಲದ ಅಡಿಗೋತ್ತರದ ಕಾಲದಲ್ಲೂ ಅವರು ಪ್ರಸ್ತುತರಾಗಿರುವುದು ಒಂದು ಅಪೂರ್ವದ ವಿದ್ಯಮಾನ ಮಾತ್ರವಲ್ಲ ಎಂದು ಬಣ್ಣಿಸಿದರು.

ನಾನು ನನ್ನ ವೈಯಕ್ತಿಕ ಆಕಾಂಕ್ಷೆಯ ಈಡೇರಿಕೆಗಾಗಿ ಯಾರಿಗೂ ಎಂದೂ ಮುಜುಗರ ಉಂಟು ಮಾಡಿಲ್ಲ. ಆದರೆ ಈಗ ಈ ಎಲ್ಲರಿಂದ ಮೊಗೇರಿ ಗೋಪಾಲಕೃಷ್ಣ ಅಡಿಗ ಸ್ಮಾರಕವನ್ನು ಗುರುದಕ್ಷಿಣೆಯಾಗಿ ಬಯಸುತ್ತಿದ್ದೇನೆ. ಆ ನಿಟ್ಟಿನಲ್ಲಿ ಪ್ರ್ರಾಮಾಣಿಕ ಒಲವು, ಸಾಧಿಸುವ ಸಾಮರ್ಥ್ಯ ಮತ್ತು ಛಲ ಹೊಂದಿರುವ ಎಲ್ಲರೂ ನನ್ನ ಈ ಕೋರಿಕೆಯನ್ನು ಈಡೇರಿಸುವರು ಎಂಬ ಭರವಸೆ ನನಗಿದೆ ಎಂದರು.

ಭಾಷೆ ಮತ್ತು ಕಲಿಕಾ ಮಾಧ್ಯಮ:
ಒಂದು ಕಾಲದಲ್ಲಿ ಇಂಗ್ಲಿಷ್ ಕಲಿಕೆಯ ಬಗೆಗೇ ಈ ದೇಶದಲ್ಲಿ ಕೆಲವು ವರ್ಗಗಳ ವಿರೋಧ ಇತ್ತು. ವಿದೇಶಗಳಲ್ಲಿ ಉದ್ಯೋಗದ ಬಾಗಿಲು ಉದಾರವಾಗಿ ತೆರೆಯಲ್ಪಟ್ಟ ಬಳಿಕ ಇಂಗ್ಲಿಷ್ ಮಾಧ್ಯಮ ಬೇಡ ಎಂಬ ಧೋರಣೆಗೆ ಮಾತ್ರ ಸ್ವಾಗತ ದೊರೆಯಿತು. ಸರ್ಕಾರಗಳೂ ಅಡ್ಡಗೋಡೆಯ ಮೇಲೆ ದೀಪ ಇರಿಸಿದಂತೆ ವರ್ತಿಸಿದುವು. ಜನರ ಆರ್ಥಿಕ ಸ್ಥಿತಿ ಸುಧಾರಿಸಿದಂತೆ ಇಂಗ್ಲಿಷ್ ಮಾಧ್ಯಮದಲ್ಲಿ ಕಲಿಕೆ ಸಮಾನತೆ ಮತ್ತು ಪ್ರತಿಷ್ಠೆಯ ಪ್ರಶ್ನೆಯಾಗಿ ಮಾರ್ಪಟ್ಟಿತು. ನ್ಯಾಯಾಲಯಗಳು ಭಾಷಾಮಾಧ್ಯಮದ ಆಯ್ಕೆಯನ್ನು ವ್ಯಕ್ತಿಯ ಸ್ವಾತಂತ್ರ್ಯದ ಹಕ್ಕಾಗಿ ನಿರ್ವಚನ ಮಾಡಿದುವು. ಒಟ್ಟು ವಾತಾವರಣ ಹೇಗಾಯಿತೆಂದರೆ ಆಂಗ್ಲ ಮಾಧ್ಯಮ ಶಿಕ್ಷಣವು ಗುಣಮಟ್ಟದ ಶಿಕ್ಷಣದೊಂದಿಗೆ ಸಮೀಕರಿಸಲ್ಪಟ್ಟಿತು. ಅಂತಹ ಭಾವನೆ ಪೋಷಕರನ್ನು ಅದರಿಂದ ಹಿಂದಕ್ಕೆ ಸೆಳೆಯುವ ಪ್ರಯತ್ನ ಫಲ ನೀಡದಷ್ಟು ಗಟ್ಟಿಗೊಂಡಿತು. 

ಸರ್ಕಾರಿ ಕನ್ನಡ ಮಾಧ್ಯಮ ಶಾಲೆಗಳು ಗುಣಮಟ್ಟ ಮತ್ತು ಸೌಲಭ್ಯದ ದೃಷ್ಟಿಯಲ್ಲಿ ಬಹುಸಂಖ್ಯೆಯ ಆಂಗ್ಲ ಮಾಧ್ಯಮ ಶಾಲೆಗಳಿಗೆ ಕಡಿಮೆ ಇರದಿರುವುದು, ಅಧಿಕ ಆಂಗ್ಲ ಮಾಧ್ಯಮ ಶಾಲೆಗಳಲ್ಲಿನ ಗುಣಮಟ್ಟ ಕನ್ನಡ ಮಾಧ್ಯಮ ಶಾಲೆಗಳ ಗುಣಮಟ್ಟಕ್ಕಿಂತ ಹೆಚ್ಚಿಲ್ಲದಿರುವುದು, ಅಲ್ಲಿನ ಶಿಕ್ಷಕರ ಆಂಗ್ಲ ಭಾಷೆಯ ಪ್ರೌಢಿಮೆ ಮತ್ತು ಬೋಧನಾ ಕೌಶಲ ಸರ್ಕಾರಿ ಕನ್ನಡ ಮಾಧ್ಯಮ ಶಾಲೆಗಳಲ್ಲಿ ದುಡಿಯುವ ಶಿಕ್ಷಕರ ಆಂಗ್ಲ ಭಾಷಾ ಪ್ರೌಢಿಮೆ ಮತ್ತು ಅದನ್ನು ಬೋಧಿಸುವ ಕೌಶಲಕ್ಕಿಂತ ತೀರ ಹೆಚ್ಚಿಲ್ಲದಿರುವುದು ಕೂಡ ಪೋಷಕರ ಕಣ್ಣು  ತೆರೆಸಲಿಲ್ಲ. 

ಮುಚ್ಚುವ ಹಂತದಲ್ಲಿ ಸರ್ಕಾರಿ ಶಾಲೆಗಳು : 
ಎಲ್ಲ ಭಾರತೀಯ ಭಾಷೆಗಳ ಕುಸಿತಕ್ಕೆ ಪ್ರಮುಖ ಕಾರಣವಾಗಬಹುದಾದ್ದು ಜನರಲ್ಲಿರುವ ಆಂಗ್ಲ ಭಾಷೆಯ ಕುರಿತಾದ ತಪ್ಪು ತಿಳಿವಳಿಕೆ. ಆ ಕಾರಣದಿಂದ ಹೆಚ್ಚುತ್ತಿರುವ ಅದರ ಪ್ರಭಾವ, ಕಲಿಕೆ ಹಾಗೂ ಬಳಕೆ. ಶಿಕ್ಷಣದ ವಾಣಿಜ್ಯೀಕರಣವೂ ಈ ಪ್ರವೃತ್ತಿಗೆ ತನ್ನ ಕೊಡುಗೆ ನೀಡುತ್ತಿದೆ. ಇಂಗ್ಲಿಷ್ ಸೇರಿದಂತೆ ಯಾವುದೇ ಭಾಷೆ ಕಲಿಯಲು ಎಲ್ಲರೂ ಸ್ವತಂತ್ರರು. ಆದರೆ ಅದು ಮಾಧ್ಯಮವಾಗಬೇಕೇ, ಆದರೆ ಯಾವ ಹಂತದಿಂದ ಎಂಬ ಜಿಜ್ಞಾಸೆಗೆ ಉತ್ತರ ಕಂಡುಕೊಳ್ಳಬೇಕು. ಒಂದು ಭಾಷೆಯಲ್ಲಿ ಪ್ರಭುತ್ವ ಪಡೆಯಲು ಅದು ಕಲಿಕಾ ಮಾಧ್ಯಮವಾಗಬೇಕು ಎಂಬ ವಾದವನ್ನು ನಾನು ನಿರಾಕರಿಸುತ್ತೇನೆ. ಅದು ಆಧರಿಸಿರುವುದು ಅದಕ್ಕೆ ಪಠ್ಯಕ್ರಮದಲ್ಲಿ ನೀಡುವ ಮಹತ್ವ ಮತ್ತು ಅದನ್ನು ಕಲಿಸುವ ವಿಧಾನ ಎನ್ನುವುದು ನನ್ನ ದೃಢ ನಂಬಿಕೆ. 

ಕೆಲವು ಕನ್ನಡ ಮಾಧ್ಯಮ ಶಾಲೆಗಳಲ್ಲಿ ಮಕ್ಕಳ ಸಂಖ್ಯೆ ಹೆಚ್ಚಿಸಲು ಮಾಡಿರುವ ಆಂಗ್ಲ ಮಾಧ್ಯಮ ಕೆಜಿ ಮತ್ತು ಅನ್ಯ ತರಗತಿಗಳ ಆರಂಭ, ವಾಹನ ಸೌಕರ್ಯ ಸೃಷ್ಟಿ, ವಿವಿಧ ಪ್ರಲೋಭನೆಗಳೂ ನಿರೀಕ್ಷಿತ ಪರಿಣಾಮ ಬೀರಿಲ್ಲ. ಎಲ್ಲವೂ ಇದೇ ವೇಗದಲ್ಲಿ ಸಾಗಿದರೆ ರಾಜ್ಯದ ಎಲ್ಲ ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳು ಆಂಗ್ಲ ಮಾಧ್ಯಮ ಶಾಲೆಗಳಾಗುವ ಮತ್ತು ಅವುಗಳಲ್ಲಿ ಕನ್ನಡ ಒಂದು ಭಾಷೆಯಾಗಿ ಮಾತ್ರ ಉಳಿದುಕೊಳ್ಳುವ ದಿನ ದೂರದಲ್ಲಿಲ್ಲ ಎಂದೆನಿಸುತ್ತದೆ. 

ಸಾಂಸ್ಕೃತಿಕ ವಿಕೇಂದ್ರೀಕರಣ: 
ಭಾಷೆ ಹೇಗೆ ಮನುಷ್ಯನ ಜೀವನವನ್ನು ವ್ಯಾಪಕವಾಗಿ ಪ್ರಭಾವಿಸುತ್ತದೋ, ಅದರಿಂದ ಹುಟ್ಟುವ ಸಾಹಿತ್ಯವೂ ಅಂತಹ ಶಕ್ತಿ ಮತ್ತು ಸೌಂದರ್ಯವನ್ನು ಹೊಂದಿದೆ. ಭಾಷೆ ಸಂವಹನ, ಅರಿವು, ಮನೋಲ್ಲಾಸಕ್ಕೆ ಕಾರಣವಾದಂತೆ ಸಾಹಿತ್ಯವೂ ಆ ಕೆಲಸಮಾಡುತ್ತದೆ. ಓದು, ದರ್ಶನ, ಚಿಂತನದ ಇನ್ನೊಂದು ಆಯಾಮ ಸಮ್ಮೇಳನ, ಚರ್ಚೆ, ಗೋಷ್ಠಿ, ಇತ್ಯಾದಿ. 

ತಾಲ್ಲೂಕುಗಳ ವಿಭಜನೆ ಆಡಳಿತ ವಿಕೇಂದ್ರೀಕರಣಕ್ಕೆ ಕಾರಣವಾದಂತೆ ಸಾಹಿತ್ಯ ಚಟುವಟಿಕೆಗಳ ವಿಕೇಂದ್ರೀಕರಣಕ್ಕೂ ಕಾರಣವಾದ ವಿದ್ಯಮಾನಕ್ಕೆ ನಾವೆಲ್ಲ ಸಾಕ್ಷಿಗಳಾಗುತ್ತಿದ್ದೇವೆ. ಇದು ಗ್ರಾಮೀಣ ಭಾಗಕ್ಕೂ ವಿಸ್ತರಿಸಲ್ಪಡಬೇಕೆಂದು ನಾನು ಆಶಿಸುತ್ತೇನೆ. ಅದಕ್ಕೆ ಅಲ್ಲಿ ಪರಿಷತ್ತಿನ ಘಟಕ ಸ್ಥಾಪಿಸುವ ಅಗತ್ಯವಿಲ್ಲ. ಈಗ ಜಾರಿಯಲ್ಲಿರುವ ಗ್ರಾಮ ಸ್ವರಾಜ್ ಮತ್ತು ಪಂಚಾಯತ್ ರಾಜ್ ಕಾಯಿದೆಯ ನಿರ್ದೇಶಕ ತತ್ವಗಳು ಸ್ಥಳೀಯ ಸಮುದಾಯದ ಕಲೆ, ಸಂಸ್ಕೃತಿ, ಮತ್ತು ಪರಂಪರೆಗಳನ್ನು ರಕ್ಷಿಸುವುದು ಮತ್ತು ಕಾಪಾಡುವುದು ಗ್ರಾಮ ಪಂಚಾಯಿತಿಗಳ ಹೊಣೆ ಎಂದರೆ, ಗ್ರಾಮ ಪಂಚಾಯಿತಿಗಳ ಕಡ್ಡಾಯ ಪ್ರಕಾರ್ಯಗಳ ಪಟ್ಟಿಯಲ್ಲಿ ’ಸಾಂಸ್ಕೃತಿಕ ಹಬ್ಬಗಳನ್ನು, ಸಾಹಿತ್ಯ ಚಟುವಟಿಕೆಗಳನ್ನು ಮತ್ತು ಕ್ರೀಡೆಗಳನ್ನು ಸಂಘಟಿಸುವುದನ್ನು, ಅವುಗಳಿಗೆ ಉತ್ತೇಜನ ನೀಡುವುದನ್ನು ಹಾಗೂ ಅಲ್ಲಿನ ಜನರ ಪ್ರತಿಭೆ ಅಭಿವ್ಯಕ್ತಗೊಳ್ಳಲು ಅವಕಾಶ ಕಲ್ಪಿಸುವುದನ್ನು’ ಸೇರಿಸಲಾಗಿದೆ ಎಂದರು. 

► ಬೈಂದೂರು ತಾ. ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಮಾರ್ದನಿಸಿದ ಕನ್ನಡದ ಅಸ್ಮಿತೆ, ಅಡಿಗರ ಸ್ಮಾರಕ ವಿಚಾರ - - https://bit.ly/2EvmLGy .






9:37 PM | 0 comments

ಬೈಂದೂರು ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಮಾರ್ದನಿಸಿದ ಕನ್ನಡದ ಅಸ್ಮಿತೆ, ಅಡಿಗರ ಸ್ಮಾರಕ ವಿಚಾರ

ನಮ್ಮತನ ಉಳಿಸಿಕೊಳ್ಳದ ಹೊರತು ಕನ್ನಡಕ್ಕೆ ಉಳಿವಿಲ್ಲ
ಬೈಂದೂರು ತಾಲೂಕು ಪ್ರಥಮ ಕನ್ನಡ ಸಾಹಿತ್ಯ ಸಮ್ಮೇಳನ ಉದ್ಘಾಟಿಸಿ ಡಾ. ಜೆ. ಈಶ್ವರ ಭಟ್


ಕುಂದಾಪ್ರ ಡಾಟ್ ಕಾಂ ಸುದ್ದಿ.
ಬೈಂದೂರು: ಪರಕೀಯರದ್ದು ಉತ್ತಮ, ನಮ್ಮದು ಅದಮ ಎಂಬ ಮನೋಭಾವ ಕನ್ನಡಿಗರಲ್ಲಿ ಇಂಗ್ಲೀಷ್ ವ್ಯಾಮೋಹ ಹೆಚ್ಚಿಸಿದೆ. ಭಾಷೆಯ ಮೇಲಿನ ಆಕ್ರಮಣ ಕನ್ನಡಕ್ಕಷ್ಟೇ ಸೀಮಿತವಾಗಿಲ್ಲ ಎಲ್ಲಾ ಪ್ರಾದೇಶಿಕ ಭಾಷೆಗಳ ಮೇಲೆಯೂ ಆಗಿದೆ. ನಮ್ಮತನ ಉಳಿಸಿಕೊಳ್ಳದ ಹೊರತು ಕನ್ನಡಕ್ಕೆ ಉಳಿವಿಲ್ಲ ಎಂದು ಮಂಗಳೂರು ವಿಶ್ವವಿದ್ಯಾನಿಲಯದ ವಿಶ್ರಾಂತ ಪ್ರಾಧ್ಯಾಪಕ ಡಾ. ಜೆ. ಈಶ್ವರ ಭಟ್ ಹೇಳಿದರು.

ಅವರು ಶನಿವಾರ ಉಡುಪಿ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಬೈಂದೂರು ತಾಲೂಕು ಘಟಕದ ಆಶ್ರಯದಲ್ಲಿ ಕಂಬದಕೋಣೆ ಸಂವೇದನಾ ಪ್ರಥಮ ದರ್ಜೆ ಕಾಲೇಜು ಸಭಾಭವನದ ಪ್ರೋ. ಬಿ. ಎಚ್. ಶ್ರೀಧರ ವೇದಿಕೆಯಲ್ಲಿ ಜರುಗಿದ ಕನ್ನಡ ಸಾಹಿತ್ಯ ಸಮ್ಮೇಳನ ಸಾಧನಾ - ೨೦೧೯ನ್ನು ಉದ್ಘಾಟಿಸಿ ಮಾತನಾಡಿದರು.

ಈವರೆಗೆ ಕನ್ನಡದ ನೂರಾರು ಸಾಹಿತ್ಯ ಸಮ್ಮೇಳನಗಳ ನಡೆದಿವೆ. ಆದರೆ ಈವರೆಗೂ ಕನ್ನಡ ಭಾಷಾ ಬಳಕೆಯ ಬಗೆಗೆ ಸ್ಪಷ್ಟ ನಿಲುವು ತಳೆಯಲು ಸಾಧ್ಯವಾಗಿಲ್ಲ ಎಂಬುದು ವಿಷಾದ ವ್ಯಕ್ತಪಡಿಸಿದ ಅವರು ಭಾಷೆ ಕೆಡುವುದರಲ್ಲಿ ದೃಷ್ಯ ಮಾಧ್ಯಮಗಳ ಪಾಲು ದೊಡ್ಡದಿದೆ ಎಂದರು.

ಕನ್ನಡ ಸಾಹಿತ್ಯ ಪರಿಷತ್ ಜಿಲ್ಲಾಧ್ಯಕ್ಷ ನೀಲಾವರ ಸುರೇಂದ್ರ ಅಡಿಗ ಮಾತನಾಡಿ ಮನಸ್ಸಿನ ಸ್ವಚ್ಛತೆಗಾಗಿ ಸಾಹಿತ್ಯ ಚಟುವಟಿಕೆಗಳು ನಿರಂತರವಾಗಿ ನಡೆಯುವ ಅಗತ್ಯವಿದೆ. ನುಡಿಹಬ್ಬದ ಮೂಲಕ ನಾಡಪ್ರೇಮ, ದೇಶಪ್ರೇಮ ಮೂಡಿಸಲು ಸಾಧ್ಯವಾದವರೆ ಸಮ್ಮೇಳನ ಶ್ರಮ ಸಾರ್ಥಕ ಎಂದರು.

ನಿಕಟಪೂರ್ವ ಸಮ್ಮೇಳನಾಧ್ಯಕ್ಷ ಬಿ. ಅಪ್ಪಣ್ಣ ಹೆಗ್ಡೆ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಡೋಲು ಬಾರಿಸಿ ಉದ್ಘಾಟಿಸಿ ಮಾತನಾಡಿ  ಕುಂದಾಪುರ ಕನ್ನಡದಷ್ಟು ಉತ್ಕೃಷ್ಟವದ ಕನ್ನಡವಿಲ್ಲ.   ಆದರೆ ಪಾಶ್ಚಾತ್ಯರ ಅನುಕರಣೆಯಿಂದ ಮಾತೃಭಾಷೆಯನ್ನು ಮರೆಯುತ್ತಿದ್ದೇವೆ. ಕುಂದಗನ್ನಡಕ್ಕೆ ಅಕಾಡೆಮಿ ಸ್ಥಾಪಿಸುವ ಅಗತ್ಯವಿದೆ. ನಮ್ಮ ಉತ್ತರಾಧಿಕಾರಿಗಳು ಉತ್ತಮ ಕನ್ನಡಿಗರಾಗಲಿ ಎಂದು ಆಶಿಸಿದರು. 

ನಿಕಟಪೂರ್ವ ಸಮ್ಮೇಳನಾಧ್ಯಕ್ಷ ಬಿ. ಅಪ್ಪಣ್ಣ ಹೆಗ್ಡೆ ಅವರು ಸರ್ವಾಧ್ಯಕ್ಷ ಎಸ್. ಜನಾರ್ದನ ಮರವಂತೆ ಅವರಿಗೆ ಕನ್ನಡದ ಧ್ವಜವನ್ನು ಹಸ್ತಾಂತರಿಸಿದರು. ನಿವೃತ್ತ ಐಎಫ್‌ಎಸ್ ಅಧಿಕಾರಿ ಬಿ. ಜಗನ್ನಾಥ ಶೆಟ್ಟಿ ಶೇಖರ ಅವರ ಶ್ರವಣದ ಬುಟ್ಟಿ ಹಾಗೂ ಕೀರ್ತಿರಾಜ್ ಹೆರಂಜಾಲು ಅವರ ಕಿವಿ-ಕೇಳುವುದಲ್ಲ ಕಲಿ ಪುಸ್ತಕಗಳನ್ನು ಬಿಡುಗಡೆಗೊಳಿಸಿದರು. ಸಾಹಿತಿ ಕೂ.ಗೋ ಭಟ್ ಅವರ ಪುಸ್ತಕಗಳನ್ನು ಅತಿಥಿಗಳಿಗೆ ವಿತರಿಸಲಾಯಿತು. ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ ನಿಕಟಪೂರ್ವಾಧ್ಯಕ್ಷ ಎಎಸ್‌ಎನ್ ಹೆಬ್ಬಾರ್, ಮರವಂತೆ ಗ್ರಾಮ ಪಂಚಾಯತ್ ಅಧ್ಯಕ್ಷೆ ಅನಿತಾ ಸಮ್ಮೇಳನದ ಅಧ್ಯಕ್ಷರನ್ನು ಗೌರವಿಸಿದರು. ಉದ್ಘಾಟಕರಾದ ಡಾ. ಜೆ. ಈಶ್ವರ ಭಟ್ ಅವರನ್ನು ಸನ್ಮಾನಿಸಲಾಯಿತು.

ಹಿರಿಯ ಶಿಕ್ಷಣ ತಜ್ಞ ಎಸ್. ಜನಾರ್ದನ ಮರವಂತೆ ಸಮ್ಮೇಳನಾಧ್ಯಕ್ಷತೆ ವಹಿಸಿದ್ದರು. ಜಿಲ್ಲಾ ಪಂಚಾಯತ್ ಸದಸ್ಯೆ ಗೌರಿ ದೇವಾಡಿಗ, ಕ್ಷೇತ್ರ ಶಿಕ್ಷಣಾಧಿಕಾರಿ ಜ್ಯೋತಿ, ಕಂಬದಕೋಣೆ ಸ.ಪ.ಪೂ. ಕಾಲೇಜಿನ ಪ್ರಾಂಶುಪಾಲ ಗಣಪತಿ ಅವಭೃತ್, ಸಂವೇದನಾ ಪ್ರಥಮ ದರ್ಜೆ ಕಾಲೇಜಿನ ಪ್ರಾಂಶುಪಾಲೆ ಸಂಧ್ಯಾ ಭಟ್, ಬ್ರಹ್ಮಾವರ ತಾ. ಕಸಾಪ ಅಧ್ಯಕ್ಷ ಸೂರಾಲು ನಾರಾಯಣ ಮಡಿ, ಸ.ಪ.ಪೂ ಕಾಲೇಜು ಉಪ್ಪಂದ ಪ್ರಾಂಶುಪಾಲ ರಾಮಕೃಷ್ಣ ಬಿ.ಜಿ, ನಿವೃತ್ತ ಶಿಕ್ಷಕ ಸದಾಶಿವ ಶ್ಯಾನುಭೋಗ್, ಬೈಂದೂರು ರೋಟರಿ ಅಧ್ಯಕ್ಷ ಐ. ನಾರಾಯಣ, ಕಂಬದಕೋಣೆ ಗ್ರಾ.ಪಂ ಅಧ್ಯಕ್ಷ ಆನಂದ ಪೂಜಾರಿ, ಕೆರ್ಗಾಲು ಗ್ರಾಮ ಪಂಚಾಯತ್ ಅಧ್ಯಕ್ಷೆ ಸೋಮು ಅತಿಥಿಗಳಾಗಿದ್ದರು.


ಸಂವೇದನಾ ಪ್ರಥಮ ದರ್ಜೆ ಕಾಲೇಜು ವಿದ್ಯಾರ್ಥಿಗಳು ನಾಡಗೀತೆ ಹಾಡಿದರು. ಕಸಾಪ ಬೈಂದೂರು ತಾಲೂಕು ಅಧ್ಯಕ್ಷ ರವೀಂದ್ರ ಎಚ್. ಸ್ವಾಗತಿಸಿ, ಗೌರವ ಕೋಶಾಧ್ಯಕ್ಷ ಕುಶಲ ಗಾಣಿಗ ವಂದಿಸಿದರು. ಗೌರವ ಕಾರ್ಯದರ್ಶಿ ಗಣಪತಿ ಹೋಬಳಿದಾರ್ ನಿರೂಪಿಸಿದರು.

ಉದ್ಘಾಟನೆಗೂ ಪೂರ್ವದಲ್ಲಿ ಕಂಬದಕೋಣೆ ಗ್ರಾ.ಪಂ ಅಧ್ಯಕ್ಷ ಆನಂದ ಪೂಜಾರಿ ರಾಷ್ಟ್ರ ಧ್ವಜಾರೋಹಣ, ಕೆರ್ಗಾಲು ಗ್ರಾ. ಪಂ. ಅಧ್ಯಕ್ಷೆ ಸೋಮು ಕನ್ನಡ ಧ್ವಜಾರೋಹಣ ಹಾಗೂ ಕಸಾಪ ಬೈಂದೂರು ತಾಲೂಕು ಅಧ್ಯಕ್ಷ  ರವೀಂದ್ರ ದೇವಾಡಿಗ ಪರಿಷತ್ ಧ್ವಜಾರೋಹಣ ಮಾಡಿದರು. ಉಪನ್ಯಾಸಕ ಜಯರಾಮ ಕಾರ್ಯಕ್ರಮ ನಿರ್ವಹಿಸಿದರು. ಸಾಹಿತ್ಯ ಪರಿಷತ್ ಜಿಲ್ಲಾ ಗೌರವ ಕಾರ್ಯದರ್ಶಿ ಸುಬ್ರಹ್ಮಣ್ಯ ಭಟ್, ತಾಲೂಕು ಗೌರವ ಕಾರ್ಯದರ್ಶಿ ಪ್ರಕಾಶ್ ಹೆಬ್ಬಾರ್ ನಾಡಾ ಮೊದಲಾದವರು ಉಪಸ್ಥಿತರಿದ್ದರು. 

ಅಭೂತಪೂರ್ವ ಮೆರವಣಿಗೆ:
ಸಮ್ಮೇಳನ ಅಧ್ಯಕ್ಷರನ್ನು ಕಂಬದಕೋಣೆಯಿಂದ ಮೆರವಣಿಗೆಯ ಮೂಲಕ ಕರೆತರಲಾಯಿತು. ಇದಕ್ಕೂ ಮೊದಲು ಮರವಂತೆಯ ಗ್ರಾಮಸ್ಥರು ಹತ್ತಾರು ವಾಹನಗಳ ಸಾಲಿನೊಂದಿಗೆ ಅಧ್ಯಕ್ಷರನ್ನು ಕರೆತಂದದ್ದು ವಿಶೇಷವಾಗಿತ್ತು. ಮರವಂತೆ ಕೊರಗ ತನಿಯ ಕಲಾತಂಡದ ಡೋಲು, ಸದಾಶಿವ ಶ್ಯಾನುಭೋಗರ ಸೂರ್ಯವಾದ್ಯ ವಿಶೇಷ ಆಕರ್ಷಣೆಯಾಗಿತ್ತು. 

ಗಮನ ಸೆಳೆದ ತಿಂಡಿ, ಊಟದ ಮೆನು:
ಸಮ್ಮೇಳನದ ತಿಂಡಿ ಹಾಗೂ ಊಟದ ಮೆನು ಸಾಹಿತ್ಯಾಸಕ್ತರ ಗಮನ ಸೆಳೆಯಿತು.  ಬೆಳಗಿನ ಬಿಗು ಉಪಹಾರವಾಗಿ ನೂಕಡ್ಡಿ ಪುಲಾವ್, ಅಡಿಗಾಸ್ ಚಟ್ನಿ, ಮಾಯ್ಯಾಸ್ ತುಪ್ಪದ ಕೇಸರಿಬಾತ್, ಅಸ್ಸಾಂ ಚಹಾ, ಚಕ್ಕಮಂಗಳೂರು ಕಾಫಿ ಇದ್ದರೆ, ಮಧ್ಯಾಹ್ನ ಟಾಟಾ ಉಪ್ಪು, ಬೇಡಕರ್ ಉಪ್ಪಿನಕಾಯಿ, ಎಂಟಿಆರ್ ಗೊಚ್ಚು, ಕುಜ್ಜೆ ಅಜತ್ನ, ಗಂಗಾವತಿ ಸಣ್ಣಕ್ಕಿ ಅನ್ನ, ಕೋಲಾರ ಟೊಮೆಟೋ ಸಾರು, ನಾಗೂರು ಸೌತೆಕಾಯಿ ನುಗ್ಗೆಕಾಯಿ ಹುಳಿ, ಗುಣ ಸುಂದರಿ, ಖಡ್ಗ ರಾವಣ, ಪತಂಜಲಿ ಪಾಯಸ, ನಂದಿನಿ ಜೀರ್ಣಾಮೃತವಿದ್ದರೆ, ಸಂಜೆ ಲಘು ಉಪಹಾರಕ್ಕೆ ಕೊಡಗಿನ ಚಹಾ, ಬ್ರೆಜಿಲ್ ಕಾಫಿ, ಕಾರಂತರ ಗ್ಯಾಸ್ ಬೋಂಡಾ, ತಾಂಬೂಲದಲ್ಲಿ ಹಿರಿಯ ಸಾಹಿತಿಗಳಿಗೆ ನಂಜನಗೂಡು ನಶ್ಯ, ಕಿರಿಯ ಸಾಹಿತಿಗಳಿಗೆ ಮೋಹಿನಿ ನಶ್ಯ, ಬಂಡಾಯ ಸಾಹಿತಿಗಳಿಗೆ ಚಂಪಾ ನಷ್ಯ ಇದೆ ಎಂದು ಮುದ್ರಿಸಿದ್ದರು.

ಪುಕ್ತಕ ಕೊಳ್ಳುವವರ ಸಂಖ್ಯೆ ಕ್ಷೀಣ:
ಸಾಹಿತ್ಯ ಸಮ್ಮೇಳನದಲ್ಲಿ ೩-೪ ಪುಸ್ತಕದ ಅಂಗಡಿಗಳು ಬಂದಿದ್ದರೂ ಪುಸ್ತಕ ಕೊಳ್ಳುವವರ ಸಂಖ್ಯೆ ಕಡಿಮೆ ಇತ್ತು. ಅಲ್ಲೊಬ್ಬರು ಇಲ್ಲೊಬ್ಬರು ಎಂಬಂತೆ ಪುಸ್ತಕ ಕೊಳ್ಳುತ್ತಿರುವುದು ಕಂಡುಬಂತು. 

ಹಳೆಯ ವಸ್ತುಗಳ ಪ್ರದರ್ಶನ:
ಸಮ್ಮೇಳನದಲ್ಲಿ ಹಳೆ ಕಾಲದ ಜಾನಪದ ವಸ್ತುಗಳ ಪ್ರದರ್ಶನ ಗಮನ ಸೆಳೆಯಿತು. ಸಾಹಿತ್ಯ ಸಮ್ಮೇಳನ ಕಾರ್ಯದರ್ಶಿ ಗಣಪತಿ ಹೋಬಳಿದಾರ್ ಅವರು ಸಂಗ್ರಹಿಸಿದ್ದ ಹಳೆ ಕಾಲದ ನಾಣ್ಯಗಳು, ವಿವಿಧ ಗೃಹೋಪಯೋಗಿ ವಸ್ತುಗಳನ್ನು ಪ್ರದರ್ಶಿಸಿದ್ದರು.

ಉದಯರಾಗ:
ತ್ರಾಸಿ ರಾಜೇಶ್ ದೇವಾಡಿಗ ಮತ್ತು ಬಳಗ ಉದಯರಾಗದಲ್ಲಿ ಪ್ರಸ್ತುತಪಡಿಸಿದ ಸ್ಯಾಕ್ಸೋಫೋನ್ ವಾದನ ಗಮನ ಸೆಳೆಯಿತು.

ಅಚ್ಚುಕಟ್ಟು ಸಮ್ಮೇಳನ:
ಬೈಂದೂರು ತಾಲೂಕು ಇಡಿ ಸಮ್ಮೇಳನ ಅಚ್ಚುಕಟ್ಟಾಗಿ ನಡೆಯಿತು. ಎಲ್ಲಿಯೂ ಗೊಂದಲವಿಲ್ಲದೇ ಸಮಾರೋಪದ ತನಕ ವಿವಿಧ ಗೋಷ್ಠಿ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು.

► ಅಡಿಗರ ಸ್ಮಾರಕ ನಿರ್ಮಾಣವೇ ತನಗೆ ನೀಡಬಹುದಾದ ಗುರುದಕ್ಷಿಣೆ   - https://bit.ly/2GVffYW .






















9:34 PM | 0 comments
Kundapraa.com Kundapra.com Kundapura news Byndoor news 

ಕುಂದಾಪ್ರ ಡಾಟ್ ಕಾಂ- editor@kundapra.com

byndoor.com, shirurunews.com, udupi.com, kundapura trolls
11:50 AM | 0 comments

Samashti Media Ventures

A leading organisation for Online and Offline Promotion Solution 



www.samashtimedia.com

11:34 AM | 0 comments

ಇ-ಮೇಲ್ ಪಡೆಯಲು ಇಲ್ಲಿ ನೊಂದಾಯಿಸಿ.

Obituary

ಹೆಬ್ಬಾರರ ಅಂಕಣ

ಅಂಕಣ ಬರಹ - 2

Dictionary

Entertainment

Ad here

Ad here

Alvas Nudisiri spl pages

Byndoor Directory

Web design & Hosting

Old age home in Kundapura

Nammabedra.com

Udupitoday.com

Kinnigolli.com

Kolluru dairy

Kolluru dairy

Shekar Ajekar